Bakıdan Sumqayıta metro nə vaxt çəkiləcək? - AÇIQLAMA

Bakı şəhərində hər gün tıxaclar daha da dərinləşir. Xüsusilə Sumqayıtdan paytaxta gələn sərnişinlərin sayı çox olduğundan yolların yükü artır və hərəkət çətinləşir.

Bu səbəbdən sakinlər arasında əsas sual budur: Bakıdan Sumqayıta metro nə vaxt çəkiləcək və nə zaman istifadəyə veriləcək?

Avtosfer.az-ın məlumatına görə, mövzu ilə bağlı "redaktor.az"a açıqlama verən nəqliyyat eksperti Rauf Ağamirzəyev bildirdi ki, Sumqayıta dəmir yolu ötən əsrin 60-cı illərində fəaliyyətə başlayıb və 2015-ci ildən bərpa olunub. O, qeyd etdi ki, 2019-cu ildən artıq dairəvi sistem işləyir:

"Hal-hazırda Xırdalan-Sumqayıt arasında bəzi təmir işləri aparıldığından həmin sahə müvəqqəti bağlanıb. Amma problemin kökü başqa yerdədir. Yük və sərnişin trafikinin ayrılması vacibdir və bu məsələ dövlət proqramına daxil edilib. Yeni layihəyə əsasən, Güzdək sahil yolu ərazisində dəmir yolu tikilməsi planlaşdırılır ki, yük trafikinin şəhərə daxil olmadan hərəkəti təmin olunsun".

Ağamirzəyevin sözlərinə görə, Dövlət Proqramına əsasən, yeni 20 qatar alınması nəzərdə tutulub ki, bu da mövcud intensivliyə birbaşa təsir göstərəcək:

"Qatarlar daha intensiv işləyəcək və ideal halda 15-20 dəqiqə intervalla hərəkət etməlidirlər. Həmçinin yeni stansiyaların tikilməsi planlaşdırılır: Sumqayıtda 2, Xırdalanda 2, Binəqədi Cənub və ilin sonunda istifadəyə veriləcək Dərnəgül stansiyası. Bu işlərin həyata keçirilməsi infrastrukturun mövcud yerüstü metro funksiyasını daşımasına və sərnişin hərəkətinin daha intensiv olmasına imkan yaradacaq".