Ekspert: "Bir sıra sürücülər yenilikləri qəbul etmək istəmir"

Bakı Nəqliyyat Agentliyi (BNA) tərəfindən bir sıra küçələrdə yenidənqurma işləri həyata keçirilir. Artıq iki küçədə işlər yekunlaşmaq üzrədir. Bunlar Xətai rayonundakı Məzahir Rüstəmov və İnqilab İsmayılov küçələridir. Nəqliyyat üzrə ekspert Rauf Ağamirzəyev Qaynarinfo-ya açıqlamasında aparılan işləri təhlükəsizlik və küçə infrastrukturunun yaxşılaşdırılması baxımından müsbət qiymətləndirdiyini bildirib:  "BNA-nın küçələrdə apardığı yenidənqurma işlərini müsbət qiymətləndirirəm. Həyata keçirilən tədbirlər birbaşa axına müsbət təsir edən bir faktorlardır. "Cib” tipli parklanma yerlərinin yaradılması nəticəsində sürücülər konkret olaraq bilirlər ki, avtomobili harda saxlamaq olar. Yenidənqurma işləri aparılmış küçələrdə hərəkətdə olan avtomobil piyada zolağına yaxınlaşdıqca sürücü piyadanın hərəkətini daha aydın görə bilir. Nəticədə sürüclərin görmə məsafəsi yaxşılaşdırılır ki, bu da həm piyada, həm də sürücülər üçün təhlükəsizlik baxımından önəmli məsələdir. Digər tərəfdən, həyata keçirilən bu tədbirlər  ümumi küçə infrastrukturuna müsbət təsir edəcək. Lazımi imkanları olan digər küçələri də bu formatda inşa etmək lazımdır”. 

Ekspert qeyd edib ki, sözügedən yenidənqurma işləri barədə maarifləndirici addımların atılmasına ehtiyac var: "Bir sıra sürücülər ənənəvi formatda olan küçələrə öyrəşdikləri üçün bəzi yenilikləri ya qəbul etmək istəmir, ya da görməzdən gəlirlər. Bu istiqamətdə çoxsaylı maarifləndirici videoçarxlar hazırlamaq lazımdır. Eyni zamanda, yenidənqurma işləri dövründə bu işlərin aparıldığı ərazilərdə müvəqqəti nişanların, küçə təhvil verildikdən sonra isə isə daimi nişanların və piyada zolaqlarının yerləşdiyi ərazilərdə işıqlandırma sistemlərinin yaradılmasına diqqəti artırmaq lazımdır”.