Bu şəxslərin ictimai nəqliyyatdan pulsuz istifadəsi mümkün ola bilər - EKSPERT AÇIQLADI

Bəzi ölkələrdə pensiya alan vətəndaşlara ictimai nəqliyyat xidmətləri ya tamamilə pulsuz təqdim edilir, ya da ciddi endirimlər tətbiq olunur. Bu həmin ölkələrin sosial rifah siyasətinin bir hissəsi kimi həyata keçirilir.

Bəs, ölkəmizdə bu mümkündürmü?

Avtosfer.az-ın məlumatına görə, mövzu ilə bağlı nəqliyyat eksperti Rauf Ağamirzəyev "Konkret.az"a açıqlamasında bildirib ki, Azərbaycanda da bu təşəbbüsün həyata keçirilməsi mümkündür, lakin bunun üçün mövcud biznes modeli dəyişdirilməlidir.

Rauf Ağamirzəyev

“Brutto müqavilələrə keçid olmalıdır. Yəni daşıyıcı şirkətlər hər kilometrə görə subsidiya almalıdırlar. Bu halda müxtəlif bilet paketlərinin – günlük, həftəlik, aylıq, 6 aylıq və illik paketlərin tətbiqi ilə yanaşı, güzəşt kateqoriyasına aid olan şəxslər, o cümlədən pensiyaçılar üçün endirimli biletlərin təşkili mümkün olacaq”, – deyə ekspert vurğulayıb.