Cərimələnə bilərsiniz! - “Avtobuslara nəzarət kamerası quraşdırılacaq” - FOTO

Yazarlar 22 Noyabr 2023 13:18 Oxunub 8384
Cərimələnə bilərsiniz!  - “Avtobuslara nəzarət kamerası quraşdırılacaq”  - FOTO
WhatsApp kanalımıza abunə ola bilərsiniz

Sosial mediada atobusların üzərinə nəzarət kameralarının yerləşdirilməsi görüntüləri əks olunub. Belə ki, həmin kameralar avtobus zolağına daxil olan avtomobilləri çəkib DYP-ə təqdim etmək məqsədi güdəcək. 

Bəs bu prosesin nə vaxtdan tətbiq ediləcəyi planlaşdırılır?

Mövzu ilə əlaqədar nəqliyyat eksperti Elməddin Muradlı “MediaPost”a cavab verib ki, hazırda belə bir məsələ faktiki olaraq yoxdur. O bildirib ki, bu kameraları Qazaxıstanın “Sergek” qrup şirkəti Azərbaycanda test üçün avtobuslara quraşdırıb:

Sürücülərimiz nəzarət olmayan yerdə ölümə getməkdən çəkinmir - Elməddin Muradlı

“Bu kameralar çoxfunksiyalıdır, avtobus zolağına daxil olan nəqliyyat vasitələrini, eyni zamanda digər qayda pozuntularını qeydə alır və əsas funksiyası aidiyyəti üzrə yol polisinin mərkəzi informasiya sisteminə yönləndirməkdən ibarətdir. Azərbaycanda bu cəmi bir, ya iki avtobusda quraşdırılıb və hələ heç kimə cərimə yazılmır, sadəcə test rejimində işləyir. Zamanla bəlli olacaq ki, həmin kameraların çəkdiyi qayda pozuntuları rəsmi sənəd kimi sayılacaq, yoxsa yox. Nəticəsi olarsa, “Yol hərəkəti haqqında” qanunda, İnzibati Xətalar Məcəlləsində bununla bağlı müəyyən dəyişikliklər olmalıdır”. 

Ekspert qeyd edib ki, hələlik qanunvericilik imkan vermədiyinə görə heç kim deyə bilməz ki, avtobusa quraşdırılan kamera ona cərimə yazıb: “Faktiki olaraq bugünkü qanunvericiliyə uyğun olmadığı üçün bu dəqiqə kiməsə cərimə yazılacağını düşünmürəm. Lakin belə bir məsələ gözlənilir. Ancaq gələcəkdə bu texnologiyanın imkanlarından istifadə edərək tətbiq etmək mümkündür və olmalıdır. Çünki artıq avtobus zolaqlarına nəzarət etmək çətindir, hər yüz metrdən bir kamera qoymaq faktiki olaraq mümkün deyil. Ancaq mütəmadi olaraq həmin marşrutlar bunları qeydə alıb  polisin mərkəzi informasiya sisteminə ötürsə, bir növ Rəqəmsal İnkişaf və Nəqliyyat Nazirliyinə və ya Azərbaycan Yerüstü Nəqliyyat Agentliyi ilə yol polisinin işinə töhfə vermiş olacaq. Bu zaman artıq sürücülər də biləcək ki, avtobus zolağına girmək olmaz, avtobus zolağı elə avtobuslar üçün nəzərdə tutulub. Beləliklə, bu məsələ ilə bağlı testin nəticələrindən sonra atılacaq addımları gözləmək lazımdır”.

ŞƏRH YAZ
Ad

E-mail

Şərh