«Ölüm yolu»; burada hər il 200 nəfər can verir - FOTOLAR

Şəkillərdə gördüyünüz yol Boliviyadadır və dünyanın ən təhlükəli yollarından biridir. Avtosfer.az-ın məlumatına görə, yolun adı mahiyyətinə uyğundur: «Ölüm yolu». «Ölüm yolu» Boliviyanın şimalını ölkənin paytaxtı ilə birləşdirən yeganə yoldur. Uzunluğu cəmi 70 km olan bu yolu «şöhrətləndirən» onun başlanğıcı ilə sonu arasında təxminən 3300 metr hündürlük fərqinin olmasıdır. Yol dəniz səviyyəsindən 3600 m hündürlükdə başlayır, dəniz səviyyəsindən 330 m hündürlükdə başa çatır. Yol ensiz olmaqla sərt uçurumlardan keçir, çoxlu döngələri, sərt yoxuş və enişləri var. Cəmi 20 kilometri asfaltdır. Qalan hissəsi palçıq və çınqılla örtülüb.

And dağlarının dumanlı, çiskinli yamaclarından Amazon cəngəlliklərinə enən bu yolun tez-tez dumanla örtülməsi, güclü leysanlar onu daha da təhlükəli edir. Bu səbəblərdəndir ki, həmin yolda hər il 25 avtomobil uçurumdan dərəyə düşür. Nəticədə bu yolda hər il təxminən 100-200 adam ölür. «Ölüm yolu»nda ən dəhşətli qəza 24 iyul 1983-cü ildə olub: 100 nəfərdən artıq insanın olduğu avtobus hündür kanyondan dərəyə düşüb. Yolun təhlükəliliyini artıran həm də odur ki, bu yolda qəzaya düşərək xəsarət almış insanı xəstəxanaya aparmaq üçün elə həmin yolla bir neçə saat yol getmək lazım gəlir.

Avtosfer.az