Qarlı Bakıda fantastik qəza sayı: Nəyi səhv etmişik? - AÇIQLAMA

Bu il fevralın 21-dən etibarən ölkə ərazisində qeydə alınan qarlı hava şəraiti nəticəsində qeydə alınan sığorta hadisələrinin sayı məlum olub. Azərbaycan Sığortaçılar Assosiasiyasından (ASA) bildirilib ki, qarlı havaya görə 1500-ə yaxın avtomobilə 1 mln. manatadək ziyan dəyib.

Belə hadisələrin təkrarlanmaması üçün hansı tədbirlər görülməlidir?

Avtosfer.az-ın məlumatına görə, mövzu ilə bağlı Ölkə.az-a danışan nəqliyyat eksperti Yasin Mustafayev bildirib ki, soyuq havalarda belə hadisələrin baş verməsi normaldır:

"Neçə vaxtı belə şaxta, qar, buz görmürük. Ona görə belə hadisələrə çox alışmamışıq. Sürücülər uzun müddətdir şaxtalı havada avtomobil idarə etmirlər. Yolların buz bağlaması, eyni zamanda avtomobillərdə olan bəzi problemlər, qış təkərlərinin dəyişdirilməməsi və.s hamısı ümumi təsir göstərən amillərdir. Nəticədə belə qəzalar baş verir. Statistikadakı rəqəmlər kifayət qədər ciddi rəqəmlərdir. Hazırda hava artıq düzəldi, həyat normasına qayıtdı. Amma bu cür havalara hazır olmalıyıq. Hər bir halda təkərləri dəyişməliyik. Təcrübəsi az olan sürücülər avtomobil idarə etməsinlər. Eyni zamanda müvafiq qurumlar yola vaxtında qum, duz səpsinlər, qarı təmizləsinlər. Qaydalara, tələblərə əməl olunsun ki, belə hadisələr daha az olsun. Amma nə etmək olar ki, uzun müddətdir qar da yağmırdı və  vətəndaşlar da, sürücülər də yadırğamışdılar".