"Qayda pozan sürücülər radar və kameradan daha çox qorxurlar" - AÇIQLAMA

Ötən günlərdə Biləcəri qəsəbəsi ərazisində yol-nəqliyyat hadisəsinin baş verib. Hadisə zamanı yük maşınının körpüdən avtomobilin üzərinə aşması nəticəsində iki nəfər ölüb. Həmin ərazidə eyni hadisə dəfələrlə təkrarlanıb.

Avtosfer.az xəbər verir ki, mövzu ilə bağlı "Redaktor.az"a açıqlamasında nəqliyyat eksperti Elməddin Muradlı bildirdi ki, yük maşınının təxmini sürətini müəyyənləşdirmək lazımdır. 

"Sadəcə olaraq, həmin ərazidə sürətin minimallaşdırılması bəzi vasitələrlə məcburi edilməlidir. Asfalt üzərində çıxıntılar və süni maneələr yaradılaraq sürücülərin sürəti azaltması təmin olunmalıdır. Həqiqətən də, bu ərazidə ilk yol-nəqliyyat hadisəsi deyil. Dəfələrlə orada qəza halları baş verib. Ərazidə radar qurğusunun quraşdırılması da müəyyən nəticələr verə bilər, çünki sürücülər radardan qayda və cəzadan daha çox qorxurlar. Ümumilikdə götürdükdə, orada nişanlar mövcuddur, sərt döngə olduğunu bildirən işarələr vardır. Sadəcə həmin işarələrə əməl edilməlidir".

Ekspert qeyd etdi ki, qəza baş verən ərazidə yalnız yol qaydaları deyil, yükdaşıma qaydaları da ciddi şəkildə pozulub.

"Yük düzgün qablaşdırılmayıb və bərkidilməsi açıq qalıb. Bu məsələlər araşdırılmalıdır: yük haradan gəlir, haradan yüklənib, niyə qaydalar pozulub və bərkidilmə hissəsi niyə açıq qalıb? Cavab gözləyən çoxlu suallar mövcuddur. Mən ümid edirəm ki, istintaq orqanları bu sualları cavabsız qoymayacaq”, - deyə müsahibimiz yekunlaşdırdı.