Regionlarda yaşayanlara ŞAD XƏBƏR: Avtobuslar kartla ola bilər...

“Bakıdakı “BakıKart” modeli regionlarda da tətbiq oluna bilər”. Avtosfer.az xəbər verir ki, bunu nəqliyyat eksperti Rauf Ağamirzəyev "Konkret.az"a açıqlamasında deyib.

Ekspert bildirib ki, ümumilikdə nağdsız ödəniş sisteminin bütün ölkə üzrə tətbiqi vacibdir:

“Bir sıra şəhərlərdə bu istiqamətdə addımlar atılıb. Məsələn, Sumqayıtda bu sistem tətbiq olundu, lakin sonradan ləğv edildi. Hazırda Şamaxıda fəaliyyət göstərir. Bu, ölkədə bank kartı ilə ödəniş imkanı yaradan ilk və yeganə sistemdir. Gözlənilir ki, Gəncə və Naxçıvanda da bu növ keçidlər daha tez baş versin. Digər rayonlarda da belə keçidlər gözləniləndir.”

Rauf Ağamirzəyev əlavə edib ki, əsas məsələ bununla yanaşı daşıyıcıların maliyyə dayanıqlığını təmin edən Brutto müqavilələrə keçiddir:

“Bu zaman hər kilometrə görə daşıyıcıya subsidiya veriləcək. Bunun hesabına günlük, həftəlik, aylıq, 6 aylıq və illik bilet paketləri təklif edilər. Həmçinin güzəşt qrupları da bu imkanlardan faydalana bilər. Ölkə üzrə bank kartı ilə ödənişin tətbiqi vacibdir. Bu həm ödəniş baxımından, həm də istifadəçilərin əlavə kart daşımaq zərurətini aradan qaldırmaq baxımından daha rahat olar.”