Sumqayıtla Saray qəsəbəsini birləşdirən körpü qəzalı vəziyyətdədir - FOTO - VİDEO

Sumqayıt şəhəri ilə Saray qəsəbəsini birləşdirən körpü qəzalı vəziyyətdədir.

Avtosfer.az xəbər verir ki, bu barədə həmin körpüdən mütəmadi istifadə edən sürücülər şikayət ünvanlayıblar.

Şikayətdə bildirilir ki, Sumqayıtla Saray qəsəbəsi arasında olan körpüdəki yol örtüyündə iki ildən çoxdur ki, böyük çatlar yaranıb. Körpünün həmin hissəsində artıq xeyli vaxtdır, çökmənin meydana gəlməsi də sürücülər üçün ciddi təhlükə yaradıb.

"Yol elə vəziyyətdədir ki, həmin yerə çatanda mütləq sürəti tam azaltmaq lazımdır. O yola nabələd olan adamlar isə bunu bilmirlər, nəticədə real təhlükə ilə üzləşirlər. Körpünün altından dəmiryol xəttinin keçməsi də təhlükəni birə-beş artırır.

Bundan əlavə, Sumqayıtdan Saray istiqamətinə keçən hissədə olan işıqforun fəaliyyəti də neçə aydır, dayandırılıb. Səbəb kimi körpüyə düşən yükün azaldılması göstərilir. Deyilənə görə, işıqfor işləyəndə nəqliyyat vasitələri körpünün üzərində dayanmalı olur ki, bu da ağırlığı artırır.

Problem neçə ildir ki, var, amma aidiyyəti qurumlar hansısa tədbir görməyə tələsmirlər. Əgər burada ağır hadisə baş versə, məsuliyyəti kim daşıyacaq?" - deyə şikayətdə qeyd olunur.

Sözügedən ərazidən video və fotoları təqdim edirik:

(Oxu.az)