Taksi qiymətləri bahalaşacaq? - AÇIQLAMA

Bəzi taksi sürücüləri arasında gələn aydan etibarən taksi qiymətlərinin artacağı barədə söyləntilər var. Hətta taksi şirkətlərinin təklif etdiyi ekonom xidmətlərin belə ləğv ediləcəyi, komfort xidmətlərin isə nisbətən daha ucuz qiymətə təklif olunacağı barədə də fikirlər mövcuddur.

Bəs bu fikirlər nə qədər doğrudur? Taksilərin qiymətində hansı dəyişikliklər gözlənilir?

Mövzu ilə əlaqədar nəqliyyat eksperti Elməddin Muradlı "Operativ Media"ya açıqlamasında qeyd edib ki, rəsmi olaraq hər hansısa bir qiymət artımı planlaşdırılmır.

"Şirkətlər ola bilsin ki, müəyyən qədər bu işi həyata keçirərlər. Amma, rəsmi qaydada belə bir hal baş verəcəyi təqdirdə mütləq əvvəlcədən vətəndaşlara da bildirilərdi. Ötən il yay aylarında minimal qiymətlər müəyyənləşib və 2 manat 50 qəpikdən başlayır. Yəni əvvəlki kimi 70-80 qəpiyə heç kim yol qət edə bilmir. Çox güman kimsə bu şayiəni ortaya atıb, amma, belə bir hal planda yoxdur. Xidmətlərin çeşidinə gəldikdə isə bu, əlbəttə, fərqli olmalıdır. Yəni ekonom, orta sinif və komfort xidmətlər şirkətlər tərəfindən təqdim oluna bilər. Əgər bəzi şirkətlər ekonom xidmətini ləğv edəcəksə, bu, artıq onun şəxsi işidir. Ümumi respublika üzrə isə hər hansı bir qiymət artımından söhbət getmir".