“Velosiped kirayəsi ilə tıxacın qarşısını almaq olmaz” - Elməddin Muradlı

Bakı şəhərində ilk “bike-sharing” (velosiped kirayəsi) xidməti fəaliyyətə başlayıb.

50-yə yaxın məntəqədə müvafiq konstruksiyalar quraşdırılıb, velosipedlərin kirayə qaydası barədə məlumatları əks etdirən lövhələr yerləşdirilib.

Maraqlıdır, yeni xidmətin yaradılması yollarda tıxacı azaldacaqmı?

Mövzu ilə bağlı sualları cavablayan nəqliyyat eksperti Elməddin Muradlı bildirib ki, velosiped kirayəsi xidmətinin fəaliyyətə başlaması tıxacın qarşısını almayacaq:

“Bu mikromobillik proqramı çərçivəsində atılan addımdır. Əhali üçün əlçatan mexanizm formasına salınır. Amma mən velosiped kirayəsinin tıxacları azaldacağı fikrinə qatılmıram. İndi yaydır, insanların velosipedə marağının artdığını görürük. Tez-tez yollarda velosipedçilərə rast gəlirik, amma heç kim deyə bilməz ki, bu qışda və payızda da belə olacaq”.

O həmçinin qeyd edib ki, tıxacı aradan qaldırmaq üçün yol şəbəkəsini və piyada keçidlərini inkişaf etdirmək lazımdır:

“Yol şəbəkəsini və piyada keçidlərini inkişaf etdirmək, piyada səkilərini alverçilərdən, villa, dönərxana, apteklərdən alıb piyadalara qaytarmaq, avtobus və metro stansiyaların sayını artırmaq lazımdır. Tıxaca təsir edən amillər bunlardır. Kiminsə velosiped kirayələməsi ilə tıxacın azalacağı inandırıcı deyil”.

(konkret.az)