"Yanvarın 1-dən taksilərlə bağlı cərimələr tətbiq olunacaq" - DİQQƏT! - EKSPERT ŞƏRH ETDİ

Məlumdur ki, Azərbaycanda “Avtomobil nəqliyyatı haqqında” qanununa əsasən, taksi sifarişi operatoru fəaliyyətinə icazələrin verilməsinə başlanılıb. Məlumata görə, artıq 4 şirkət müvafiq sənədləri elektron sistem üzərindən təqdim edərək icazənin alınması üçün agentliyə müraciət edib. Sia mövzu ilə bağlı nəqliyyat eksperti Elməddin Muradlının fikirlərini öyrənib.

Elməddin Muradlı bildirib ki, Azərbaycanda bir neçə taksi şirkəti və taksi operatoru var: "Operator o deməkdir ki, onların heç birinin qarajı yoxdur. Onlar yalnız operator xidmətini yerinə yetirir. Yəni, müştəri ilə sürücünü bir-biri ilə əlaqələndirirlər.

Azərbaycanda qanuna edilmiş yeni dəyişikliyə görə şirkətlər hamısı RİNN-in yaratdığı mərkəzi sistemdə qeydiyyatdan keçməlidirlər. Onların qeydiyyatı təsdiqləndikdən sonra əməkdaşlıq etdikləri hər bir sürücü haqqında məlumatları mərkəzi bazaya yerləşdirməlidirlər. Bu baza onun üçün lazımdır ki, burada sürücülərin iş və istirahət rejiminə nəzarət olunsun, təcrübə, sertifikat, tibbi arayış məsələləri və nəqliyyat vasitəsi texniki tələblərə cavab verirmi kimi sulların cavabı oradan tapılsın.

Taksi şirkətləri artmır. Hamısı mövcud olan şirkətlərdir. Lakin indiyə kimi öz bildikləri şəkildə fəaliyyət göstərirdilərsə, indi dövlət tərəfindən qoyulan qanunlar çərçivəsində fəaliyyətə dəvət olunurlar. Onlar bu fəaliyyəti qanun üzərindən qurmasalar 40 manatdan 40 min manata qədər cərimə oluna bilərlər. Yanvar ayının 1-dən isə artıq cərimələr tətbiq olunacaq".