“Yanvarın 1-dən taksi sürücüləri yeni qərarlara tabe olmalıdırlar” - AÇIQLAMA

Azərbaycan Respublikası Nəqliyyat Nazirliyinin 2016-cı il 16 may tarixli 18/Q nömrəli qərarı ilə təsdiq edilmiş "Taksi minik avtomobillərinin sürücüləri üçün etik davranış və avtomobil nəqliyyatı ilə sərnişin daşımalarını tənzimləyən normativ hüquqi aktlara dair xüsusi hazırlığın keçirilməsi Qaydası"nda dəyişiklik edilməsi haqqında Azərbaycan Respublikasının Rəqəmsal İnkişaf və Nəqliyyat Nazirliyinin Kollegiyası Qərar verib.

Nəqliyyat məsələləri üzrə ekspert Elməddin Muradlı verilən qərarları “MediaPost”a şərh edib.

O bildirib ki, bu ilin əvvəlindən başlayaraq taksi sürücüləri arasında etik davranış məsələləri və digər qaydaların tətbiqi mövzusunda təbliğat işləri aparılır:

“Onların diqqətinə çatdırılır ki, taksi sürücülərinə xas olan davranışlara yiyələnsinlər, etik davranış qaydalarını pozmasınlar. Taksi xidməti göstərmək üçün tələb olunan qaydalara əməl etsinlər və bu qaydalar çərçivəsində də xidmət göstərsinlər. Yəni artıq qanunsuz fəaliyyət və digər məsələlər geridə qalmalıdır. Bu sahədə tənzimləyici qurum olan Rəqəmsal İnkişaf və Nəqliyyat Nazirliyi tərəfindən təkliflər verilib və hökumət tərəfindən təsdiqlənib. Qanunvericilik sahəsində boşluqlar aradan qaldırılır. Buradakı normativ hüquqi aktları da cənab nazir Rəşad Nəbiyev təsdiqləyib və elektron qaydada dərc olunandan sonra qüvvəyə minəcək. Qərarda sürücülərin etik davranış məsələsi öz həllini tapır və sürücülər bilməlidirlər ki, gələn il yanvarın 1-dən qaydalar çərçivəsində fəaliyyət göstərmədikləri halda onlar barəsində müvafiq qaydada tədbirlər görüləcək, cərimələr tətbiq olunacaq”.