Bakıda və Xocavənddə yeni kulinariya və enoturizm mərkəzləri yaradılacaq

Azərbaycan mətbəxinin və qastronomiya turizminin beynəlxalq miqyasda tanıdılması üçün kompleks layihələr həyata keçiriləcək.
Avtosfer.az xəbər verir ki, bu, Prezident İlham Əliyev bu gün təsdiqlədiyi "Turizmin inkişafına dair 2026–2030-cu illər üçün Dövlət Proqramı"nda öz əksini tapıb.

Sənədə görə, ölkədəki 70-dən çox restoran "Gault and Millau", "La Liste" kimi beynəlxalq bələdçi bazalarına inteqrasiya ediləcək, 3 restoranın isə beynəlxalq ölçmə-dəyərləndirmə sistemlərindən ("Ulduz", "Açar", "Gurman") sertifikat alması dəstəklənəcək.

Bundan başqa:

Bakının Bayıl qəsəbəsində Bayıl Kulinariya Təcrübə Mərkəzi, Xocavənddə isə Tuğ Enoturizm (Şərabçılıq) Təcrübə Mərkəzi (şərab zavodu və üzüm bağları) istifadəyə veriləcək;

"Milli dadlar" elektron portalı süni intellekt və beynəlxalq axtarış sistemlərinə inteqrasiya olunacaq;

200 yerli aşpaz beynəlxalq dərəcəli sertifikatlar alacaq;

Ölkə üzrə 25 çimərlikdə abadlıq işləri aparılaraq beynəlxalq standartlara uyğun nümunəvi ictimai çimərliklər yaradılacaq.