Atmosferə zərər verən hansıdır - Yanacaq, yoxsa mühərrik – EKSPERT AÇIQLADI

Qaydalara uyğun olaraq, avtomobillər tərəfindən atmosferə atılan zərərli maddələrin miqdarının azaldılması ilə səciyyələnən 6 növ AVRO standartı mövcuddur. Standartın adında göstərilən nömrə (1,2,3,4,5 və 6) nə qədər yüksək olarsa, həmin sandartların tələblərinə cavab verən avtomobilin istismar zamanı ətraf mühitə atılan zərərli maddələrin miqdarı bir o qədər azdır.

Ətraf mühit və ya digər faktorlarda zərərlik baxımından yanacaq növü, yoxsa mühərrik daha çox fərq yaradır?

Bu barədə Avtosfer.az-a açıqlama verən nəqliyyat eksperti Eldəniz Cəfərov bildirib ki, daxili yanma üsulu ilə çalışan mühərriklər yəni benzin və dizel yanacağı ilə işləyən avtomobillər atmosferə daha çox zərər verir: Bu gün dünyada qəbul olunmuş ən zərərsiz mühərrik su ilə işləyən mühərriklərdir. Belə ki, bu su kristalı ilə havanın təmasından işə düşən, hidrogenlə işləyən avtomobillərdir. Daha sonra bu siyahıya sıxılmış qazla çalışan, hibrid avtomobillərini də daxil etmək olar. Bu avtomobillər atmosferə ya sıfır və yaxud da az miqdarda karbon qazını buraxır”.

Ekspert qeyd edib ki, atmosferə ən çox zərər verən və karbon qazını çox buraxan mühərriklər, dizel mühərrikli avtomobillərdir: “Ətraf mühitə zərər vuran yanacaqdır. Belə ki, yanacaq mühərikdə yanır, yanma zamanı karbon qazı yaranır və atmosferə qalxaraq ona zərər verir. Lakin elektromobillərdə karbon qazı yaranmır”.

Qeyd edək ki, ölkəmizdə “Avro-5” standartları qəbul olunub. “Avro-5” standartlı yanacağın istifadəsi avtomobilin işlənmiş qazının tüstüsünü azaldır və yanma məhsullarının (bərk hissəciklər, azot oksidləri, karbonmonoksit, yanmamış karbohidrogenlər) ətraf mühitə tullanmasını kifayət qədər azaldır. İşlənmiş tullantıların azaldılmasına yönəlmiş bu təşəbbüslə daha yüksək oktanlı, yəni “Aİ-95” yanacağının istifadəsi nəzərdə tutulub və ölkəyə yaşı 7 ildən çox olan köhnə avtomobillərin idxalına məhdudiyyətlər qoyulub.

Məhəbbət Tərlanoğlu