Avtomobilə qeydiyyat nişanı necə bərkidilməlidir? - Qanun nə deyir?

Son günlərin ən çox müzakirə olunan və mübahisələrə səbəb olan məsələlərdən biri dövlət qeydiyyat nişanının yeri ilə bağlıdır. Bəzi sürücülər nömrənin sağda və yaxud solda olmasının qayda pozuntusu olmadığını, bəziləri isə qayda pozuntusu olduğunu hesab edir.  

Bəs qanun nə deyir?  

“Yol hərəkəti haqqında" qanunun 29.1-ci maddəsində bildirilib ki, dövlət qeydiyyat nişanı Azərbaycan Respublikasının ərazisində və ya onun hüdudlarından kənarda yol hərəkətində olan hər bir nəqliyyat vasitəsini fərqləndirən, onun qabaq və arxa hissələrində müəyyən edilmiş yerlərdə bərkidilmiş xüsusi lövhədir. Buradan göründüyü kimi nömrə müəyyən edilmiş yerə bərkidilməlidir.  

Müəyyən edilmiş yerlər dedikdə nəzərdə tutulan nədir?  

 Əgər istehsalçı zavod istehsal etdiyi avtomobilin ön buferində dövlət qeydiyyat nişanı üçün xüsusi yer nəzərdə tutubsa, o zaman dövlət qeydiyyat nişanı həmin yerə bərkidilməlidir. Qanunvericilikdə müəyyən edilmiş yer istehsalçı tərəfindən nəzərdə tutulmuş yer kimi izah oluna bilər. Lakin bir çox avtomobil modelləri var ki, onların ön buferində dövlət qeydiyyat nişanı üçün xüsusi yer nəzərdə tutulmayıb. Belə olan halda isə sürücü nömrəni ön buferin sağına, soluna və yaxud tən ortasına bərkidə bilər və buna görə məsuliyyətə cəlb oluna bilməz. Burada bir şeyə diqqət yetirmək lazımdır ki, avtomobil ilə üz üzə durduqda, nömrə tam görünməli və rahatlıqla oxunmalıdır. 

Qeyd edək ki, nömrə istehsalçı zavod tərəfindən nəzərdə tutulan yerdə və ya ümumiyyətlə buferdə olmadığı zaman isə sürücü İnzibati Xətalar Məcəlləsinin 342.3-cü maddəsinə əsasən 40  manat məbləğində cərimə olunur. 

Məhəbbət Tərlanoğlu