Avtomobillərin "peredoku" neçə barmaq olmalıdır? - İZAH

"VAZ" markalı avtomobillərin sürücüləri bəzi hallarda ön asqı sisteminə əlavə avadanlıqlar quraşdıraraq avtomobilin qabağını qaldırırlar. Bəzən isə arxa yaylara normativ tələblərdən kənar müdaxilələr edərək arxasını aşağı salırlar. Təbii ki, bunlar qanunla qadağan edilmiş hallardır. Lakin elə hallar da olur ki, heç bir müdaxilə edilmədən avtomobilin ön asqı sistemi normadan artıq yuxarı, arxası isə aşağı görünür.

Bu, hansı hallarda ola bilir:

1) Asqı sistemindəki detalları yeniləyən zaman.

2) Arxa yaylar illərlə istismar olunduqdan sonra

Yuxarıda qeyd etdiyimiz hər iki halda konstruksiyaya müdaxilə edilməsə də, sürücülər bəzən cərimə olunmaqdan qorxurlar. Onlar redaksiyamıza sual ünvanlayaraq asqı sisteminin neçə barmaq olmasını soruşurlar.

Avtosfer.az sürücülərin həmin suallarına aydınlıq gətirərək bildirir ki, asqı sisteminin 4 barmaq olması ilə bağlı illər öncə yayılmış informasiya kökündən yanlışdır. Qanunda asqı sistemi ilə bağlı hər hansısa bir ölçü norması mövcud deyil. Əsas tələb ondan ibarətdir ki, konstruksiyaya normativ tələbləri pozan avadanlıq quraşdırılmasın və ya dəyişdirilməsin. Bunlar edilməyibsə avtomobilin ön və arxa hissəsinin necə görünməsi heç bir məsuliyyət yaratmır.

Könül