Hansı maşınların arxasında nömrə təkrar yazılmalıdır? - QANUN BELƏ DEYİR - VİDEO

Yük daşımaq üçün nəzərdə tutulmuş avtomobillərin sürücüləri son zamanlar qeydiyyat nişanları ilə bağlı yol polisi tərəfindən saxlanıldıqlarını bildirirlər. Həmin sürücülər bildirirlər ki, yük daşımaq üçün nəzərdə tutulmuş “Fiat Doblo”, “Mercedes Vito” və.s bu tip avtomobillərin arxasında qeydiyyat nişanının təkrar yazılması tələb edilir. Bunun nə  dərəcədə doğru olması sürücülərdə sual yaradır.

Qanunvericiliyə görə, qeydiyyat nişanı hansı nəqliyyat vasitələrinin arxasında təkrar yazılmalıdır?

Avtosfer.az xəbər verir ki, bu məsələ “Yol hərəkəti haqqında” qanunun 1 saylı əlavəsinin VII hissəsi ilə tənzimlənir. Həmin əlavədə qeyd olunub ki, dövlət qeydiyyat nişanlarının rəqəmləri və hərfləri yük daşıyan avtomobillərinin, qoşquların (minik avtomobillərinin və motosikletlərin qoşqularından başqa) və avtobusların (xüsusi kiçik avtobuslardan başqa) kuzovunun arxa divarında təkrar yazılmalıdır. Burada aydın şəkildə qeyd olunub ki, minik avtomobillərinin və kiçik avtobusların arxasında qeydiyyat nişanının təkrar yazılmasına ehtiyac yoxdur. Yük daşımaq üçün nəzərdə tutulmuş “Fiat Doblo”, “Mercedes Vito” və o cümlədən bu tip digər avtomobillər minik avtomobillərinin bazası əsasında istehsal edilib. Qanunvericilikdə  qeyd olunmuş tələb konkret olaraq iri yük avtomobillərinə və avtobuslara aiddir. Digər nəqliyyat vasitələrində qeydiyyat nişanının təkrar yazılması tələb edilə bilməz.

Nərmin