Maşının altına bu işıqlardan quraşdırmaq olar? - QANUN BELƏ DEYİR - VİDEO

Bəzən sürücülər avtomobilin müxtəlif yerlərinə əlavə işıq cihazları quraşdıraraq görünüşü dəyişməyə çalışırlar. Belə sürücülərdən biri Avtosfer.az-ın kamerasına düşüb. 77-ET-170 qeydiyyat nişanlı "Opel" markalı avtomobilin sürücüsü ayaqaltı hissəsinə göy rəngli işıqlar quraşdıraraq paytaxt küçələrində hərəkət edib. Bu işıq cihazları asfalt qatını işıqlandırdığı üçün digər sürücülərin diqqətini cəlb edir. Bu cür işıq cihazları nəqliyyat vasitəsini idarə etməkdən fikri yayındırır.

Bəs qanun belə işıq cihazları ilə bağlı nə deyir?

"Yol hərəkəti haqqında" qanunun 1 saylı əlavəsində qeyd olunub ki, xarici işıq cihazlarının miqdarı, tipi, rəngi, yerləşməsi və iş rejimi nəqliyyat vasitəsi konstruksiyasının tələblərinə uyğun olmalıdır. Əks halda nəqliyyat vasitəsinin istismarı qadağan edilir və inzibati məsuliyyət tədbirləri həyata keçirilir.

Videogörüntüdəki avtomobilə yerləşdirilmiş işıq cihazları nəqliyyat vasitəsinin konstruksiyasında nəzərdə tutulmadığı üçün qanun bunu qadağan edir. Bu əmələ görə sürücü 150 manat məbləğində cərimə edilə bilər.

Leyla