Sağ zolaq dağılan yollarda sol zolaqla sürənləri kamera çəkə bilər? - İZAH - VİDEO

Avtomobillərin zolaqlar üzrə düzgün yerləşməsi yol hərəkəti təhlükəsizliyinin əsas şərtlərindən biridir. Qanunvericiliyə görə, yaşayış məntəqələrindən kənarda və avtomagistrallarda sağ zolaq boş olduğu halda sol zolaqlarla hərəkət etmək qadağandır. Lakin bəzi yollar varki ağır tonnajlı yük avtomobilləri normadan artıq yük daşıdıqlarına görə sağ zolaqlar hərəkət üçün yararsız vəziyyətə düşüb. Bu cür vəziyyətdə sürücülər sol zolaqlarla hərəkət edə bilərlər?
Avtosfer.az sürücülərə qaranlıq qalan bu məsələyə aydınlıq gətirərək bildirir ki, əgər sağ zolaq dağılmış vəziyyətdədirsə sürücülər həmin zolaq boş olduğu halda digər zolaqlarla hərəkət edə bilərlər.
Məsələyə "Yol hərəkəti haqqında" qanunun 49-cu maddəsi də aydınlıq gətirir. Həmin maddəyə əsasən, normal hərəkət şəraitində sürücülər yolun sağ kənarı ilə hərəkət etməlidirlər. Lakin normal hərəkət şəraiti pozulubsa – məsələn, sağ zolaq yararsız vəziyyətdədirsə sürücülərin digər zolaqlardan istifadə etməsi qanun pozuntusu sayılmır və onlar buna görə məsuliyyətə cəlb edilə bilməzlər.

Fərid