Sahibkarların Rəqabət Məcəlləsi haqqında məlumatlandırılmasına başlanıldı

Sahibkarların Rəqabət Məcəlləsi haqqında məlumatlandırılması ilə bağlı layihənin icrasına başlanılıb. 

Avtosfer.az xəbər verir ki, bu barədə Hüquqi Tədqiqatlar Mərkəzi" İctimai Birliyindən məlumat verilib. 

Məlumatda Azərbaycanın beynəlxalq imicinin yüksəldilməsi və ölkə daxilində ədalətli iqtisadi münasibətlər sisteminin formalaşdırılması məqsədi ilə Rəqabət Məcəlləsi haqqında qanunun qəbul edildiyi xatırlanıb. 

Qeyd edilib ki, qanunun effektiv tətbiqi və ədalətli olması isə əhalinin, xüsusilə sahibkarların onun mahiyyətini və işləmə mexanizmini düzgün bilməsilə sıx bağlıdır.

Bu məqsədlə "Hüquqi Tədqiqatlar Mərkəzi" İctimai Birliyi Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Sahibkarların Rəqabət Məcəlləsi haqqında məlumatlandırılması” layihəsinin icarsına başlayıb. 

Layihə çərçivəsində Bakı, Sumqayıt, Şirvan, Lənkəran, Şəki və Qəbələ rayonlarında Məcəllənin öyrənilməsi məqsədilə görüş-müzakirələr keçiriləcək, TV-lərdə verilişlər təşkil ediləcək, sahibkarlarla dövlət qurumları arasında əməkdaşlıq formalaşacaq.

Bununla əlaqədar olaraq, ilk tədbir iyunun 14-də Sumqayıt şəhərində keçiriləcək.

(faktor.az)