Səkilərin olmaması şəhər həyatında hansı fəsadlara səbəb olur? – ARAŞDIRMA - FOTO

Şəhər mühitinin keyfiyyəti və təhlükəsizliyi birbaşa piyada infrastrukturundan asılıdır. 

Avtosfer.az xəbər verir ki, mütəxəssislər hesab edirlər ki, insan yönümlü şəhərlərin formalaşması məhz keyfiyyətli və funksional səkilərdən başlayır.

Onların sözlərinə görə, əlverişsiz, dar və ya kəsilən səkilər şəhəri piyadalar üçün əlçatmaz və təhlükəli məkana çevirir. Bu cür şəraitdə vətəndaşlar ən qısa məsafələrdə belə avtomobildən istifadə etməyə məcbur qalır ki, bu da həm nəqliyyat sıxlığını artırır, həm də ekoloji yükü ağırlaşdırır.

Səkilərin davamlılığı, kifayət qədər eni, maneəsiz hərəkət imkanı və təhlükəsizlik elementləri şəhər planlamasında əsas prioritetlərdən biri olmalıdır. Xüsusilə əlilliyi olan şəxslər, yaşlılar və uşaqlar üçün uyğun şəraitin yaradılması inklüziv şəhər mühitinin ayrılmaz hissəsidir.

Bununla yanaşı, düzgün dizayn edilmiş səkilər piyadaların hərəkətini stimullaşdırır, ictimai məkanların aktivliyini artırır və şəhərdə sosial həyatı canlandırır. Kölgəlik ağaclar, işıqlandırma, yaşıllıq zolaqları və təhlükəsiz keçidlər kimi elementlər isə bu mühiti daha komfortlu və cəlbedici edir.

Mütəxəssislər vurğulayırlar ki, şəhərlərin inkişafında prioritet yalnız avtomobillər deyil, insanlar olmalıdır. Bu baxımdan, rahat və təhlükəsiz səkilər müasir şəhərsalmanın əsas göstəricilərindən biri kimi çıxış edir.

Eltac Zülfüqaroğlu