Şirkət rəhbərlərinin nəzərinə: Sürücünüz qayda pozarsa siz də cərimələnə bilərsiniz

Müxtəlif şirkətlər və ya dövlət qurumlarının balansında olan avtomobillər yol vərəqəsi ilə sürücülər tərəfindən idarə olunur. Hətta bir avtomobili bir neçə sürücü idarə edə bilər.

Avtosfer.az bildirir ki, həmin avtomobil ilə qayda pozan sürücünü yol polisi aşkarlayarsa yerində cərimə tətbiq edir. Lakin xüsusi texniki vasitələrlə qayda pozuntusu aşkar edildikdə vəziyyət bir qədər fərqlidir. Çünki avtomobil şirkətə, yəni hüquqi şəxsə məxsusdur. Etibarnamə bir və bir neçə ola bilər. Eyni zamanda sürücü yol vərəqəsi ilə avtomobili idarə edə bilər. Bu zaman DYP şirkət və ya dövlət qurumuna sorğu göndərir. Qarşı tərəf isə öz növbəsində avtomobili idarə edən sürücü barəsində məlumat verməlidir. Əgər bu təqdim olunmazsa şirkət və ya dövlət qurumu ikiqat ziyana düşə bilər.

Çünki İnzibati Xətalar Məcəlləsinin 347-ci maddəsində nəqliyyat vasitəsinin istifadəçisi barədə məlumat verilməməsi qeydi var. Bildirilir ki, hüquqi şəxsin mülkiyyətində və ya istifadəsində, yaxud dövlət qurumunun istifadəsində olan nəqliyyat vasitəsini inzibati xətanın törədilməsi zamanı idarə etmiş fiziki şəxs haqqında məlumatın səlahiyyətli orqanın (vəzifəli şəxsin) bu barədə sorğusu daxil olduğu vaxtdan 5 gün müddətində verilməməsinə görə  vəzifəli şəxslər yüz əlli, hüquqi şəxslər üç yüz manat məbləğində cərimə edilir.

Leyla