“Şok endirimli” səyahət turlarına aldanmayın! – DİN RƏSMİSİNDƏN XƏBƏRDARLIQ

Sosial şəbəkələr reklam üçün daha əlverişlidir. Burada olan istifadəçi sayı və günümüzün son dərəcə aktiv internet məkanları olduğu üçün bura reklamverənlərin də diqqətini cəlb edir. Lakin bu haldan bəzi dələduzlar sui-istifadə edir.

Avtosfer.az xəbər verir ki, bu barədə Daxili İşlər Nazirliyi və Avto FM-in birgə layihəsi olan “Kiberinfo” verilişində DİN-in Mətbuat xidmətinin əməkdaşı Nurlan Əliyev vətəndaşlara xəbərdarlıq edib.

O, bildirib ki, sosial şəbəkədən istifadə edərkən əksər insanların qarşısına şok endirimlə arzusunda olduqları istiqamətlərə səyahətlər təklif olunan paylaşımlar çıxır: “Paylaşım tanınmış tur agentliklərinin interfeysi ilə eynilik təşkil edir. Həmçinin real qiyməti 10 min manatdan yuxarı olan tur paketini 2 min manata almaq təklif edilir. Bəzi vətəndaşlar da bu paylaşımdakı linkə dərhal keçid edir. Daha sonra isə bank kartı məlumatları istənilir. Əgər ora bu məlumatlar daxil edilsə və təsdiq verilərsə, vətəndaşa aid olan bank kartındakı bütün pullar artıq o kiber dələduzun əlinə keçmiş olacaq”.

DİN rəsmisi vətəndaşları diqqətli olmağa çağırıb: “Heç kim dəyərindən dəfələrlə aşağı təklif təqdim etmir. Vətəndaşlar özlərinə aid olan bank kartı məlumatlarını etibar etmədiyi şirkətlərə verməməlidir”.

Məhəbbət Tərlanoğlu