Sürücülük hüququ ən çox neçə il müddətinə məhdudlaşdırıla bilər? - VİDEO

Azərbaycanda yol hərəkəti qaydalarını kobud şəkildə pozan sürücülər müxtəlif müddətlərə sürücülük hüququndan məhrum edilirlər. Qanunvericilikdə bu cəza həm inzibati, həm də cinayət xarakterli hallarda nəzərdə tutulur.

Mövcud qaydalara əsasən, sürücülük vəsiqəsindən məhrumetmənin minimum müddəti 6 ay, maksimum müddəti isə 2 il təşkil edir. Lakin cinayət xarakterli hallarda bu müddət 5 ilə qədər uzadıla bilər.

Ən sərt sanksiyalar isə spirtli içki və ya narkotik vasitələrin təsiri altında sükan arxasına keçən şəxslərə tətbiq olunur. Belə ki, sərxoş halda avtomobil idarə edən sürücülər 1 ildən 2 ilədək, narkotik vasitənin təsiri altında sükan arxasına keçənlər isə 2 ilədək sürücülük hüququndan məhrum edilirlər.

Qeyd edək ki, cinayət xarakterli yol-nəqliyyat hadisələrində bu müddət daha da artır. Məsələn, sağlamlığa az ağır zərər vurulduqda 2 il, sərxoş və ya narkotik vasitənin təsiri altında insan ölümü ilə nəticələnən qəza törədildikdə isə 5 ilədək müddətə sürücülük hüququndan məhrum edilə bilərlər.

Nərmin