"VAZ" markalı avtomobillərə bu stoplardan quraşdırmaq olar, ya yox? - FOTO

"VAZ" markalı avtomobillərin sürücüləri işıq cihazlarına müəyyən dəyişikliklər edirlər. Avtosfer.az xəbər verir ki, onlar zavodun istehsal etdiyi stop işıqlarını çıxararaq yerinə Çinin istehsal etdiyi stop işıqlarını quraşdırırlar. Hətta "Niva" və "2107" markalı avtomobillərin xüsusi fiqurlar və formalardan ibarət stopları da istehsal edilir. Bunu quraşdıran sürücülər yol polisi tərəfindən cərimələndikdən sonra narazılıq edirlər. Onlar bildirir ki, bunu zavod istehsal etdiyinə görə cərimə yazılması doğru deyil. Lakin bu, kökündən yanlış fikirdir.

Avtomobili istehsal edən zavod məsləhət bilsəydi həmin işıq cihazlarını özü quraşdırıb satışa çıxarardı. Sözsüz ki, sürücülərin sonradan quraşdırdığı stop işıqları da hansısa zavodda istehsal edilir. Amma hansı şərtlər altında, hansı normativ tələblər əsasında hazırlanır, bax, bu sual altındadır. Təqdim etdiyimiz fotoların birində avtomat formalı stopları görəcəksiniz. Bunu da təbii ki, Çinin həmin zavodu istehsal edib. Bunun zavod tərəfindən istehsal edilməsi o demək deyil ki, onların istifadəsinə icazə verilir.

Qeyd edək ki, sonradan quraşdırılmış bu stop işıqlarına görə avtomobiliniz duracağa yerləşdirilə, barənizdə isə cərimə tətbiq edilə bilər.

Könül