Yol polisi qayda pozan sürücüyə videogörüntü göstərməlidirmi? - İZAH - VİDEO

Yol polisi tərəfindən saxlanılan sürücülərin əksəriyyəti qayda pozmalarına dair videogörüntü tələb edirlər. Polis əməkdaşının mütləq şəkildə videogörüntü göstərməsi ilə bağlı sürücülərdə fikir formalaşıb. Onlar elə düşünürlər ki, yol polisi videogörüntü göstərə bilmirsə cərimə yazması qanunsuzdur.

Bəs qanun bu haqda nə deyir?

"Yol Patrul Xidməti" haqqında təlimatın 4.7-ci bəndində qeyd olunub ki, YPX inspektoru tərəfindən nəqliyyat vasitəsi dayandırılarkən bütün hallarda patrul avtomobilində və ya postda quraşdırılmış videokamera daim işlək vəziyyətdə olmalı, patrul avtomobilində quraşdırılan məsafədən səs ötürən mikrofondan istifadə edilməlidir. Sürücü ilə ünsiyyət və inzibati xətanın sənədləşdirilməsi, habelə YPX inspektorunun digər hərəkətləri avtomobilin içəri hissəsində və ya kənarda kameranın görünüş dairəsində aparılmalıdır.
Qeyd edək ki, bu görüntünün sürücüyə yerindəcə təqdim edilməsi ilə bağlı yol polisinin heç bir öhdəliyi yoxdur. Hətta qanunda qeyd olunub ki, yol polisi əməkdaşı vizual şəkildə aşkar etdiyi qayda pozuntusuna görə sürücünü dayandırıb inzibati qaydada məsuliyyətə cəlb edə bilər. Sürücü narazı qaldığı təqdirdə Dövlət Yol Polisi İdarəsinə ərizə ilə müraciət edib videogörüntü ilə tanış ola bilər. Amma yolda polis əməkdaşından görüntü tələb etmək qanunda nəzərdə tutulmayıb.
 

Fərid