Bakıda avtobus dayanacağını parkinqə çevirən sürücülər - 90-FC-996 və 77-SA-209 - FOTO

Bakının müxtəlif küçələrində dayanma-durma qaydalarını pozan sürücülər görüntülənib.

Bu barədə izləyicilərdən biri Avtosfer.az-ın “Whatsapp” ünvanına fotoşəkillər göndərib. Görüntülərdən biri, oktyabrın 28-də səhər saatlarında paytaxtın Səbail rayonunda (Bibiheybət məscidinin yaxınlığında) qeydə alınıb. Belə ki, 90-FC-996 dövlət nömrə nişanlı “Audi” markalı avtomobilin sürücüsü maşını avtobus dayanacağının önündə park edib. Nəticədə avtobus sürücüsü dayanacağa daxil ola bilməyib. Onun iddiasına görə, sürücü maşını dayanacaqda uzun müddət saxlayıb.

Azadlıq prospektində qeydə alınmış digər görüntüdə də, eyni hal baş verib. Fotoşəkildən göründüyü kimi, 77-SA-209 dövlət nömrə nişanlı “Chevrolet Cobalt” nişanlı avtomobil avtobus dayanacağını zəbt edib. Şikayətçinin sözlərinə əsasən, yaranmış xoşagəlməz halla bağlı avtobus sürücüləri çətinlik çəkiblər. O bildirib ki, eyni anda məntəqəyə çatan sürücülərdən biri dayanacağa daxil ola bilmədiyi üçün avtobusu yolun hərəkət hissəsində saxlayıb.

Qeyd edək ki, sürücülər avtomobillərini avtobus dayanacağından 15 metr uzaq məsafədə və qadağandır nişanının olmadığı ərazidə park edə bilərlər.

Xatırladaq ki, sürücülərin törətdiyi bu xəta İnzibati Xətalar Məcəlləsinin 346.2-ci maddəsinə əsasən 40 manat məbləğində cəriməylə nəticələnir.

Nərmin