Bakının mərkəzində sürücülər velosiped zolağını parkinqə çevirib - FOTO

Bakıda sürücülərin sanki bir-biri ilə prinsip aparırmış kimi qaydaları kobud şəkildə pozması artıq hər gün müşahidə etdiyimiz hala çevrilib.

Avtosfer.az xəbər verir ki, paytaxtın Səbail rayonunda, şəhərin mərkəzi küçələrindən birində bir neçə ay əvvəl salınan velosiped zolağı sürücülər tərəfindən zəbt edilir.

Belə ki, dünən bir zolağının ictimai nəqliyyata ayrılması ilə bağlı müzakirələr aparılan Zərifə Əliyeva küçəsində sentyabr ayında da təkmilləşdirmə işləri aparılan velosiped zolağını sürücülər parklama yeri kimi istifadə edir. Küçədə yaranan vəziyyətin fotoları sosial şəbəkələrdə müzakirələrə səbəb olub və velosipedçilərin haqlı narazılığı ilə qarşılanıb.

Velosiped istifadəçiləri bildirir ki, şəhərin əksər mərkəzi küçələrində bu nəqliyyat vasitələrinin rahat hərəkətini təmin etmək üçün işlər görülür, lakin avtomobil idarəçiləri bu şəraiti hər addımlarında pozmağa davam edir.

Velosipedçilər sürücülərin bu cür əməllərinin aidiyyəti qurumlar tərəfindən nəzarətə götürülməsini və tezliklə həll edilməsini gözlədiklərini bildiriblər.

Səfər