Dairədə hərəkətdən xəbəri olmayan sürücü qaydanı belə pozdu - VİDEO

Bakıda yol hərəkəti qaydasını pozan sürücü qəza şəraiti yaradıb. Avtosfer.az xəbər verir ki, hadisə avqustun 26-da, paytaxtın Əhməd Rəcəbli küçəsində baş verib.

Belə ki, 77-BB-182 qeydiyyat nişanlı "Hyundai" markalı avtomobilin sürücüsü dairəvi hərəkət təşkil edilmiş yolayrıcının keçilməsi qaydasını pozub. O, dairənin sol zolağından sağa manevr edərək görüntünü qeydə alan sürücüyə təhlükə yaradıb.

"Yol Hərəkəti Haqqında" Qanunda qeyd olunub ki, dairəvi hərəkət təşkil olunmuş yolayrıcına istənilən zolaqdan daxil olmaq olar. Lakin dairəni ən sağ zolaqdan tərk etmək lazımdır.

Bu qaydanın pozulmasına görə, İnzibati Xətalar Məcəlləsinin 327.1-ci maddəsilə 40 manat məbləğində cərimə nəzərdə tutulub.

Fərid