“Peradok qaldırıb” səkini zəbt edən sürücü cəzalandırıldı - RƏSMİ - FOTO

Avqustun 7-si Babək prospektində 10-CY-707 qeydiyyat nişanlı “Tofaş” markalı avtomobilin sürücüsünün sosial şəbəkə hesabında açıq şəkildə qayda pozuntularının görüntüləri  Avtosfer.az saytında yayımlanmışdı.

Belə ki, konstruksiyasında etdiyi dəyişikliklərlə avtomobilinin “reklamını” edən sürücü maşınını park edərkən hər dəfə səkini məkan olaraq seçməsi ərazi sakinlərinin narazılığına səbəb olmuşdu. Vaxtaşırı qəzalarla yadda qalan prospektdə piyadalar belə hallar baş verdiyinə görə hər dəfə avtomobil yolu ilə hərəkət etməyə məcbur qaldıqlarını bildirirdilər.

Nizami rayon Dövlət Yol Polisi İdarəsinin əməkdaşları həmin sürücünü aşkar edib və barəsində inzibati qaydada protokol tərtib olunub. Belə ki, sürücü İnzibati Xətalar Məcəlləsinin 342.1.3 yəni, dövlət qeydiyyat nişanlarından birinin yerində olmamasına və ya mövcud standartlara uyğun olmayan dövlət qeydiyyat nişanları ilə nəqliyyat vasitəsinin idarə edilməsinə görə 40 manat, 346.9, yəni nizamlama vasitələrində başqa göstəriş nəzərdə tutulmamışdırsa, nəqliyyat vasitələrinin səkilərdə dayanmasına və ya durmasına görə 60 manat və 342.2.3. nəqliyyat vasitəsinin tam kütləsinin və bu kütlənin oxlar üzrə paylanmasının, ağırlıq mərkəzinin, təkər bazasının və ya təkər düsturunun pozulmasına, yaxud tormoz və sükan idarə sisteminin əvəz olunmasına səbəb olan dəyişikliklər edilməsinə görə 150 manat məbləğlərində cərimələnib və  nəqliyyat vasitəsi cərimə meydançasına yerləşdirilib.

Səfər