Qaydalardan xəbərsiz sürücü özünə haqq qazandırdı: "Mən baş yoldayam" - VİDEO

Masazır qəsəbəsində qaydaları pozan sürücü yolayrıcında maneə yaradıb. Avtosfer.az xəbər verir ki, hadisə avqustun 11-də, İlqar Abdullayev küçəsində (Novxanı yolunda) baş verib. Belə ki, yolayrıcından sola dönən sürücü qarşıdan gələn avtomobilin yoluna çıxaraq onun hərəkətinə mane olub. İrad bildirilən zaman isə "mən baş yoldayam" - deyərək özünə haqq qazandırıb.

Qeyd edək ki, bu yolayrıcında hər iki sürücüyə baş yol nişanı quraşdırılıb. Lakin qanunvericiliyə görə, nizamlanan yolayrıclarında üstünlük nişanları (baş yol, yol ver, stop nişanları) öz qüvvəsini itirir. Yəni, sürücü nizamlanan yolayrıcında baş yolda olsa belə, sola dönən zaman qarşıdan düzünə və sağa gedən nəqliyyat vasitələrinə yol verməlidir. Əks halda İnzibati Xətalar Məcəlləsinin 327.2-ci maddəsilə 3 bal 100 manat məbləğində cərimə oluna bilər.

Könül Rauf