Səkini parkinqə çevirib piyadaların yolunu kəsən sürücülər cərimələndi - VİDEO

Paytaxtın Nəsimi rayonu Məmmədcəfər Cəfərov küçəsində sürücülər maşınları səkidə park edib piyadaların yolunu kəsir.

Bu barədə izləyicilərdən biri Avtosfer.az-ın qaynar xəttinə videomateriallar göndərib. O bildirib ki, sözügedən küçədə səkidən sürücülər mütəmadi olaraq parklanma zonası kimi istifadə edirlər. Görüntüdən də aydın olduğu kimi, 10-AX-211 dövlət nömrə nişanlı “Mercedes G63” markalı, 10-NY-148 dövlət nömrə nişanlı “Volkswagen Jetta” markalı, 44-CE-413 dövlət nömrə nişanlı “Ford Transit” markalı, 99-CT-972 dövlət nömrə nişanlı “Hyundai” markalı avtomobillərin sürücüləri səkini zəbt ediblər. Hətta 99-JG-952 dövlət nömrə nişanlı “Isuzu” markalı yük maşınının sürücüsü vətəndaşların yolunu tamamilə kəsib və onlar bordürə çıxaraq getməli olublar.

Şikayətçinin sözlərinə əsasən, qayda pozan sürücülər yaxınlıqdakı 159 saylı tam orta məktəbin şagirdlərinə də təhlükə yaradırlar.

Qeyd edək ki, qayda pozan sürücülər Nəsimi rayon Dövlət Yol Polisi Şöbəsinin əməkdaşları tərəfindən müəyyən olunaraq inzibati məsuliyyətə cəlb olunub.

Nərmin