Sürücülərin kabusuna çevrilən "ölüm döngəsi" - Qəzaların səbəbi budur - VİDEO

Yol nəqliyyat hadisələrinin ən çox baş verdiyi ərazilərdən birinin videosu sosial şəbəkədə yayılıb. Avtosfer.az xəbər verir ki, həmin ərazi Beyləqan rayonunda yerləşir. "Görüş yolu" adlanan bu yol sahəsində sərt döngə olduğu üçün orada tez-tez ölümlə nəticələnən qəzalar baş verir.

Sərt döngəyə yaxınlaşmanı və döngənin istiqamətini bildirən xəbərdarlıq nişanları quraşdırılmasına baxmayaraq sürücülər bu nişanlara əhəmiyyət vermirlər. Onlar döngədə yüksək sürətlə hərəkət etdikləri üçün ya əks yoldakı avtomobillə toqquşurlar, ya da ki, yoldan kənara çıxaraq qəzaya düşürlər.

Rayon sakinləri sözügedən ərazidə hər ay ölümlə nəticələnən qəzaların baş verdiyini bildirirlər. Hətta sosial şəbəkə istifadəçiləri həmin döngədə yaxınlarının, tanışlarının qəzada həlak olmalarını bildiriblər.

Sürücülərə tövsiyə edirik ki, tanımadıqları yol sahələrində müəyyən edilmiş hərəkət sürətindən də aşağı sürət həddi seçsinlər və yollara quraşdırılmış xəbərdarlıq nişanlarına uyğun hərəkət etsinlər.

Nərmin