“Vasmoy”dakı bu avtoyuma məntəqəsi səkini şəxsi mülkiyyətinə çevirib - FOTO

Bakıda “moyka”nın özbaşınalığı, müştərilər və ərazidən istifadə edən vətəndaşlarla söz dalaşına çıxması sakinləri bezdirib.

Avtosfer.az xəbər verir ki, paytaxtın Nizami rayonunda fəaliyyət göstərən avtoyuma məntəqəsi səkini zəbt edib və piyadaların hərəkətinə çətinlik yaradır.

Belə ki, rayonun Elşən Süleymanov küçəsində yerləşən avtoyuma məntəqəsi sakinlərin narazlığına səbəb olub. Avtoyuma məntəqəsi səkinin zəbt etdiyi üçün müştərilər avtomobillərini məhz piyadaların hərəkət etdiyi hissədə saxlayır. Məntəqənin yaxınlığında məktəb və uşaq bağçası, avtobus dayanacağı olduğu üçün piyadaların daimi axını müşahidə olunur. Yaranan vəziyyətə görə sakinlər avtomobil yoluna düşüb hərəkət etməli olurlar. Bir çox hallarda avtomobillərini bütövlükdə səkini özəlləşdirəcək şəkildə parklayan sürücülər bəzən “moyka” əməkdaşları ilə dava-dalaş salırlar. Pul üstündə bir-birlərinə söyüş söyən şəxslər ətrafdan keçən, məntəqənin arxasında yaşayan vətəndaşları narahat etdiklərini qətiyyən düşünmürlər.

Avtoyuma məntəqəsənin yaratdığı vəziyyətin fotoları sosial şəbəkələrdə geniş müzakirələrə səbəb olub. Vətəndaşlar aidiyyəti qurumların bu cür iaşə obyektlərinin əhaliyə yaratdığı çətinliklərin, küçə zəbtinin qarşsını almalarının vacuibliyini bildiriblər.

Səfər