Xırdalanda "kamikadze sürücü": İşıqları söndürüb sürdü - VİDEO

Xırdalanda yol hərəkəti qaydasını pozan sürücünün hərəkətləri kameraya düşüb. Avtosfer.az xəbər verir ki, hadisə Heydər Əliyev prospektində qeydə alınıb.

Belə ki, günün qaranlıq saatlarında, yağışlı hava şəraitində hərəkət edən 99-RZ-715 qeydiyyat nişanlı "VAZ" markalı avtomobilin sürücüsü işıq cihazlarını söndürərək hərəkət edib.

Qeyd edək ki, günün qaranlıq saatlarında yağışlı hava şəraitində xarici işıq cihazları qoşulu olduğu halda görünmədə məhdudiyyət yaranır. İşıq cihazları sönülü olan halda isə nə sürücünün özü görür, nə də ki, digər hərəkət iştirakçıları. Belə olan zaman ikiqat təhlükə yaranır. Bu səbəbdən sürücülərə tövsiyə edirik ki, işıq cihazlarından istifadə qaydalarına ciddi şəkildə əməl etsinlər.

Xatırladaq ki, xarici işıq cihazlarından istifadə qaydalarını pozan sürücülər İnzibati Xətalar Məcəlləsinin 329.3-cü maddəsilə 30 manat məbləğində cərimə oluna bilərlər.

Fərid