Yol nişanının olmaması sürücüləri ölümlə üz-üzə qoyur - ANBAAN VİDEO

Bakıda yol hərəkətinin təşkilindəki natamamlıq sürücülərin qayda pozmasına səbəb olur. Avtosfer.az xəbər verir ki, söhbət paytaxtın Cəlil Məmmədquluzadə küçəsindən gedir. Belə ki, ayırıcı zolağın üzərinə maneəni sağdan keçməni bildirən 4.2.1 nişanı quraşdırılmadığı üçün sürücülər bilmədən qayda pozurlar. Videogörüntüdə də aydın şəkildə görünür ki, "Toyota" və "Lexus" markalı avtomobillərin sürücüləri ayırıcı zolağın əks tərəfinə çıxaraq hərəkət ediblər. Qarşıdan avtomobillərin gəldiyini gördükdən sonra başa düşüblər ki, əks yolla hərəkət ediblər. Bu zaman dayanaraq geri qayıtmağa məcbur olublar.

Qeyd edək ki, ayırıcı zolağı olan bu cür yollarda maneəni sağdan keçməni bildirən nişanın quraşdırılması mütləqdir. Əks halda baş verən qayda pozuntuları və ya qəzalara görə sürücülər məsuliyyət daşımırlar.

Fərid