Metroda birinci və axırıncı vaqonlarda niyə həmişə sıxlıq olur?

Bakı Metropolitenində səhər və axşam saatlarında olan sıxlığı ayrıca təsvir etməyə ehtiyac yoxdur. Metrodan istifadə edən də, etməyən də vəziyyətdən agahdır.

Yuxarıda dediyim fikir Yaşıl və Qırmızı xətlərə aiddir. Bənövşəyi xətdə isə interval böyük olsa da, ifrat sərnişin sıxlığı yoxdur. Amma pik saatlarında digər xətlərdə gördüyümüz vəziyyət burada da kiçik formada təkrarlanır.

Yeddivaqonlu qatarda orta vaqonlara günün istənilən saatında asanlıqla minib-düşmək olur. Lakin birinci vaqonun ilk, axırıncı vaqonun son qapısı qarşısında hər axşam sözün həqiqi mənasında basabas yaranır. Avtovağzal stansiyasına gedən sərnişinlər hamısı sonuncu vaqona minmək istədiyi üçün ciddi sıxlıq yaranır, qatar yubanır. Dəfələrlə şahidi olmuşam ki, sonuncu qapıdan minə bilməyən sərnişinlər əlavə 8 dəqiqə gözləməli olublar. Halbuki, həmin vaxt orta vaqonlarda 15-20 sərnişin olub.

Bu vəziyyətə görə metropoliteni qınamaq doğru deyil. Kiminsə 50 metr artıq yol qət etmək istəməməsi pik saatlarında metropolitenin onsuz da ağır olan işini çətinləşdirir.

Müəllif: Vüqar Yaşaroğlu