Tıxacların ən dəhşətli tərəfi: "Həyatın 25 faizi itkiyə gedir"

"Səhər və axşam 1,5 saat tıxacda qalan insan yaşaya biləcəyi zamanın yalnız 75 faizini yaşayır. Yəni 20 ildə cəmi 15 il yaşayır. Bu, şişirdilmiş rəqəm deyil. Dəqiq belədir".

Avtosfer.az “redaktor.az”a istinadən xəbər verir ki, bu barədə iqtisadçı ekspert Eldəniz Əmirov tıxacların ən dəhşətli tərəfi haqqında danışarkən bildirib.

O qeyd edib ki, insan təxminən sutkanın 12 saatını aktiv həyat yaşayır.

"Bunun da hər gün səhər-axşam 1,5+1,5 tıxacda qalırsa, aktiv həyatın tam 25 faizi itkiyə gedir.

Əgər 4 nəfərlik ailəyə münasibətdə hesablasaq daha dəhşətli mənzərə alınır. 4 nəfərlik ailə səhər-axşam tıxacda qalırsa, hərəsi 25% itirir. Onda 4 nəfərin  itkilərini toplayanda 100%-ə gəlib çatır. Bu isə o deməkdir ki, günlərini tıxacda keçirən hər 4 nəfərlik ailədə əslində cəmi 3 nəfər yaşayır. Yəni 4 nəfər 3 nəfərin həyatını yaşayır, onlardan hansısa biri əslində yoxdur", - deyə E.Əmirov bildirib.