Azərbaycanda birhəftəlik körpəni küçəyə atdılar - YENİLƏNİB

"Park ərazisində aşkarlanan birhəftəlik körpənin həyatı üçün təhlükə yoxdur".

Avtosfer.az xəbər verir ki, bunu oxu.az-ın sorğusuna cavab olaraq Daxili İşlər Nazirliyinin Mətbuat Xidmətinin əməkdaşı, polis leytenantı Lumu İsrəfilli bildirib.

Onun sözlərinə görə, ötən gecə Suraxanı rayonu Qaraçuxur qəsəbəsindəki parklardan birində polis əməkdaşları xidmət aparan zaman yenidoğulmuş körpə (oğlan uşağı) aşkar ediblər.

"Polis əməkdaşları körpəyə ilkin tibbi yardım göstəriblər. Vaxtında görülən tədbirlər nəticəsində onun həyatı xilas edilib. Daha sonra körpə polislər tərəfindən xəstəxanaya yerləşdirilib. Hazırda vəziyyəti normaldır, həyatı üçün təhlükə yoxdur. Körpənin valideynlərinin tapılması istiqamətində polis əməkdaşları tərəfindən tədbirlər davam etdirilir".

***

11:06

Bakıda birhəftəlik körpəni küçəyə atıblar. Avtosfer.az-ın məlumatına görə, hadisə Qaraçuxur qəsəbəsində qeydə alınıb.

Qəsəbə ərazisində küçəyə atılan körpə polis əməkdaşları tərəfindən tapılaraq körpələr evinə təhvil verilib.

Faktla bağlı araşdırma aparılır.