Fransa sağlarının benzin yalanı

Parlament seçkilərinin ilk turunda liderlik edən ifrat sağçı Milli Birlik Partiyasının daha bir qeyri-real vədi aşkara çıxıb. Nəticələr elan olunduqdan sonra partiyanın namizədi Jordan Bardella bildirib ki, Baş nazir seçilən kimi yanacağa tətbiq edilən əlavə dəyər vergisini 20 faizdən 5,5 faizə endirəcək. Həm də bunu dərhal, fransızlar kütləvi istirahətə getmədən edəcək.

Avtosfer.az xəbər verir ki, təklif Fransa vətəndaşlarına kifayət qədər maraqlı maraqlı gəlib. Belə olduğu təqdirdə həm benzin, həm də dizel yanacağı təxminən 30 avro senti ucuzlaşacaq. Beləliklə, 50 litr yanacaq alan sürücü təxminən 14 avroya qənaət edə biləcək.
Lakin bu vədə peşəkarlar çox da inanmırlar. Avropanın aparıcı avtomobil saytları yazır ki, Avropa İttifaqı qanunları bu vədin reallaşmasını qeyri-mümkün edir. 2006-cı Avropa Komissiyasının qəbul etdiyi direktivə görə ƏDV-nin minimal məbləği 15 faizdən az olmamalıdır. İstisna hal kimi 29 kateqoriya üzrə mal və xidmətlərə daha aşağı ƏDV tətbiq edilə bilər. Bu siyahıda yanacaq və enerji daşıyıcıları yer almır. Bu kontekstdə Milli Birlik Partiyasının vədi yerinə yetirilməmiş qalacaq. Əgər partiya vədini yerinə yetirmək istəsə Brüssellə uzun-uzadı danışıqlar aparmalı, bütün üzv ölkələri razı salmalıdır. Hazırki şəraitdə fransız diplomatların bunu bacaracağı real görünmür.
Marin le Pen də bu məsələ barədə danılşarkən Polşanı misal gətirirdi. 2022-ci ildə Polşada yanacağa tətbiq edilən vergi 23%-dən 8 faizə endirilmişdi. Lakin həmin dövrdə Ukrayna münaqişəsinə görə vəziyyət ağır olduğu üçün Avropa Komissiyası buna müstəsna hal kimi icazə vermişdi. 18 aydan sonra vergi yenidən 23 faizə qaldırıldı.

Vüqar