Mühərrikdən çıxan tüstü hansı nasazlıqlardan xəbər verir? – XƏBƏRDARLIQ - FOTO

Avtomobil sahibləri üçün mühərrikdən çıxan tüstünün rəngi bəzən çox şey deyə bilər. Çoxumuz bu tüstünü görəndə sadəcə havaya qarışdığını düşünsək də, əslində, bu, mühərrikdə baş verən nasazlıqların xəbərçisi ola bilər. 

Avtosfer.az xəbər verir ki, mühərrikdən çıxan tüstünün rənginə diqqət etmək, avtomobilinizdə potensial problemləri vaxtında aşkarlamağa və daha böyük nasazlıqların qarşısını almağa imkan verir.

Benzin mühərriklərində tüstü rəngləri nə deməkdir?

Əgər benzinlə işləyən avtomobilinizdən qara və ya boz rəngli tüstü çıxırsa, bu, yanacağın tam yanmaması ilə bağlı ola bilər. Belə hallarda tıxanmış hava filteri və qidalandırma sistemində nasazlıq ehtimalı yüksəkdir. Eyni zamanda alışdırma anının düzgün qurulmaması da bu cür tüstünün yaranmasına səbəb ola bilər.
Mavi tüstü adətən mühərrik yağının yanma kamerasına sızması nəticəsində yaranır. Bu, porşen halqalarının, klapanların və ya silindr divarının aşınmasından xəbər verə bilər. Əgər avtomobilinizdə bu rəngdə tüstü görürsünüzsə, vaxt itirmədən servisə müraciət etməyiniz məsləhətdir.

Digər tərəfdən, ağ rəngli tüstü mühərrikdə soyuducu mayenin yanma kamerasına daxil olması ilə əlaqədar ola bilər. Bəzən soyuq mühərriki işəsalma zamanı bu, təbii hal sayılsa da davamlı olaraq ağ tüstü görürsünüzsə, bu, araqatın zədələnməsi və ya silindrlər başlığında çatların yaranması ilə bağlı ola bilər.

Dizel mühərriklərdə tüstü daha ciddi siqnallardır. Dizel mühərriklli nəqliyyat vasitələrində tüstünün rəngi nasazlıq barəsində mühüm məlumat verir. Qara və ya boz tüstü, yanacağın natamam yanması ilə bağlıdır və adətən forsunkalardakı nasazlıqdan, tıxanmış hava filtrindən və ya yanlış yanacaq növündən qaynaqlana bilər. Bəzən, mühərrikin çox qızması da buna səbəb ola bilər.

Mavi tüstü mühərrik yağı ilə əlaqəlidir və mühərrikdə yağlanan detalların – porşen halqaları və klapanların aşındığını göstərə bilər. Bəzən isə bu, sadəcə olaraq mühərrik yağının normadan artıq olmasına görə də baş verir və qısa müddətdə keçib gedir.

Ağ tüstü isə Dizel mühərriklərdə, adətən, yanacağın düzgün yanmaması nəticəsində yaranır. Buna mühərrikin çox soyuq olması, yanacaq nasosu və forsunkaların nasazlığı və ya püskürmə anının səhv qurulması zəbəb ola bilər.

Nəticə etibarilə, avtomobildən çıxan tüstü təsadüfi hal deyil – bu, avtomobilinizin sizinlə "danışma üsuludur". Tüstünün rəngi və sıxlığı ilə mühərrikin içində baş verənləri müəyyən etmək mümkündür. Belə hallarda nə qədər tez reaksiya versəniz, potensial nasazlıqları vaxtında aradan qaldıra və avtomobilinizin daha uzunömürlü olmasına töhfə verə bilərsiniz.

Eltac Zülfüqaroğlu