Naxçıvan iqtisadiyyatı 2 %-ə yaxın böyüyüb

Bu ilin I yarısında Naxçıvan Muxtar Respublikasında 674,4 milyon manat dəyərində ümumi daxili məhsul (ÜDM) istehsal olunub.

Bu barədə Avtosfer.az-a Dövlət Statistika Komitəsindən bildirilib.

Məlumata görə, bu, ötən ilin eyni dövrü ilə müqayisədə 1,7 % çoxdur.

Son 1 ildə muxtar respublikada adambaşına düşən ÜDM-in dəyəri isə 1,1 % artaraq 1 438 manat olub.

Naxçıvanda 6 aylıq ÜDM istehsalının 255,6 milyon manatlıq hissəsi sənaye sektorunun payına düşüb. Bu, illik müqayisədə 3,9 % çoxdur.

Sənaye məhsulunun 229,1 milyon manatı malların, 26,5 milyon manatı isə xidmətlərin payına düşüb.

Bundan başqa, hesabat dövründə muxtar respublikada 1 il əvvələ nisbətən 0,2 % az - 132,2 milyon manatlıq kənd təsərrüfatı məhsulu istehsal olunub ki, bunun da 42,8 milyon manatı bitkiçilik sahəsi üzrə, 89,4 milyon manatı isə heyvandarlıq sahəsi üzrə olub.