Sürücülər sərfiyyatla bağlı belə aldadılır – RƏSMİ SƏNƏD 

Avtomobilin real yanacaq sərfinin təlimatda göstərilənlərlə uyğun olmaması bütün ölkələrdə sürücüləri düşündürür. Bu günlərdə isə məsələyə Avropa Komissiyası müdaxilə edib. 

Avtosfer.az xəbər verir ki, Komissiyanın həyata keçirdiyi testlər göstərib ki, avtomobilin real sərfiyyatı ilə texniki pasportda göstərilənlər ciddi şəkildə fərqlənirr. 2021-2024-cü illərdə 1 milyon avtomobilin göstəricisi ölçüldükdən sonra Komissiya belə qənaətə gəlib ki, Dizel mühərriklər hər 100 kilometrə orta hesabla 7,89 litr yanacaq sərf edir. Benzin mühərrikdə göstərici 6,88 litr təşkil edir. Halbuki, istehsalçı məlumatlarına görə bu göstəricilər müvafiq olaraq 6,38 və 5,82 litr təşkil edir. Başqa sözlə, real və rəsmi rəqəmlər arasında müvafiq olaraq 23,7% və 18,1% fərq yaranır. 
Ayrı-ayrı modellər üzrə fərq daha ciddidir. Avropa istehsalı olan bəzi avtomobillər üzrə real göstərici ilə zavod göstəricisi arasında 34%-dən çox fərq aşkar edilib. Bəzi Yaponiya və koreyalı istehsalçılar bu məsələdə daha vicdanlıdırlar. Onların real sərfiyyat fərqi 12%-i keçmir.

PS. Reklam və ya antireklam olmaması üçün biz burada konkret markalar üzrə göstəriciləri açıqlamırıq. Lakin istəyən hər kəs sənədlə Avropa Komissiyasının saytında tanış ola bilər.

Vüqar Yaşaroğlu