Ürək xəstəliyi olan sürücülərin nəzərinə: Bunları bilməlisiniz

Yollarda sürücülərin ürəktutma, huşunu itirmə və s. kimi hallarda ciddi qəzalara səbəb olduğunu müşahidə etmişik. Bəs avtomobil hərəkətdə olarkən sürücü ürəyində ağrı hiss edirsə nə etməlidir?

Avtosfer.az-ın araşdırmasına görə, ürək nahiyəsində narahatlıq və ağrı hiss edən sürücülər ilk növbədə maşını saxlamaq üçün təhlükəsiz yer tapmalıdır. Bundan sonra qəza işıqlarını yandıraraq yolun kənarına və ya dayanacağa çəkilməlidir. Dayanıb, simptomlar qiymətləndirildikdən sonra, şiddətli sinə ağrısı, nəfəs darlığı, nizamsız ürək döyüntüsü, başgicəllənmə və ya zəiflik hiss olunarsa dərhal təcili yardım çağırılmalıdır.

Həmçinin təcili yardımı gözləyərkən sürücü sakitləşməli, yavaş və dərindən nəfəs almalıdır. Əgər onun  ürəyində ağrı varsa, heç bir halda hərəkətə davam etməməlidir.

Qeyd edək ki, sürücünün hər hansı xəstəliyi üçün avtomobildə dərman saxlaması da vacib amildəndir.

Məhəbbət Tərlanoğlu