Eyni ərazi, bahalı maşın və nömrə: Sürücülər bu prospektdə təhlükə yaratmaqdan zövq alır? - FOTO

Paytaxtın Yasamal rayonu İnşaatçılar prospektində qaydaları kobud şəkildə pozan sürücü görüntülənib.

Avtosfer.az xəbər verir ki, 10-EZ-002 qeydiyyat nişanlı “Mercedes” markalı avtomobilin sürücüsü maşını dayanma-durmanın qadağan olduğu nişanın təsir dairəsində saxlayıb. Eyni zamanda avtomobil yolayrıcına 5 metrdən az məsafədə dayanıb. Bununla da sürücü digər hərəkət iştirakçılarına maneə yaradıb.

Prospektin bu ərazisində, məhz bu nişanın qarşısında nəqliyyat vasitəsini saxlamaq sürücülərdə artıq adət halını alıb və bir neçə gün əvvəl də eyni ərazidə qayda pozan başqa bahalı avtomobillə bağlı xəbər dərc etmişdik. Sanki yazdığımız xəbərlər, tətbiq edilən cərimələr həmin qaydaları pozan şəxslərə heç bir təsir etmir.

Qeyd edək ki, qaydaları bu cür pozan sürücülər İnzibati Xətalar Məcəlləsinin 346.5. “Yol hərəkəti haqqında” Azərbaycan Respublikasının Qanunu ilə müəyyən edilmiş hallar istisna olmaqla, nəqliyyat vasitələrinin hərəkət hissələrinin kəsişməsində və kəsişən hərəkət hissəsinin kənarından 5 metrdən az yaxınlıqda dayanmasına və ya durmasına görə 40 manat və 2 balla crimələnə bilərlər.

Səfər