Körpüdə ötmə edib "qabağa düşmək" istəyən sürücü dəhşətli qəza törətdi - ANBAAN VİDEO

Dünən Nəsimi rayonu, Hüseyn Seyidzadə küçəsi, körpünün üzərində  yol-nəqliyyat hadisəsi baş verib.

Avtosfer.az xəbər verir ki, körpünün üzərində əks istiqamətli yola çıxan "Opel" markalı avtomobilin sürücüsü "Toyota Prius" markalı maşının önünə çıxır. Son anda sürücü manevr etmək istəsə də qəza qaçılmaz olub. Zərbənin gücündən "Toyota Prius" markalı avtomobil alışaraq yanmağa başlayıb. 

Hadisə nəticəsində yolda tıxac yaranıb. Sürücülər xəsarətlər alıb. 

Hadisənin baş vermə anının videogörüntülərini təhlil edən zaman aydın olur ki, "Opel" markalı avtomobilin sürücüsü körpünün üzərində əks istiqamətli yola çıxaraq ötmə etmək istəyir. Görünmə məsafəsinin məhdud olduğunu nəzərə alsaq sürücü "Toyota Prius" markalı avtomobili son anda görür.

Körpünün üzərində 1.1 xətti çəkilib və ötmə qadağan edilib. Ümumiyyətlə qanunvericiliyə görə körpüdə, tuneldə, piyada keçidində ötmə qadağandır. 

Təəssüf ki, sürücülərin tələskənlik etməsi, qaydaları pozması bu cür acı nəticələr verir. 

Unutmaq olmaz ki, 5 dəqiqə "qabağa düşmək" istəyi sizin və yaxınlarınızın həyatı bahasına başa gələ bilər. Ən azı maddi ziyana düşə bilərsiniz. Videonu təqdim edirik.

Ümid edirik ki, görüntülər bəzi sürücülər üçün ibrət olacaq. 

Orxan Əli