Maşını satdığı halda cərimələndiyini iddia edən xanımın şikayətinə DYP-dən CAVAB

Şəmkir rayon sakini Lətafət İsayevanın onlayn media vasitəsilə Baş Dövlət Yol Polisi İdarəsinə ünvanladığı müraciət araşdırılıb.

Avtosfer.az-ın məlumatına görə, araşdırma zamanı müəyyən olunub ki, 1977-ci il buraxılışlı 10-FT-449 dövlət qeydiyyat nişanlı “VAZ 2106” markalı avtomobil 2015-ci ildə vətəndaş L.İsayevanın adına dövlət qeydiyyatına alınıb. Lakin həmin nəqliyyat vasitəsinin etibarnamə əsasında başqa şəxsin sahibliyinə verilməsinə dair Baş DYP İdarəsinin mərkəzi informasiya sistemində müvafiq məlumat mövcud deyil. Odur ki, sözügedən nəqliyyat vasitəsilə törədilən yol hərəkəti qaydaları əleyhinə olan inzibati xətalar xüsusi texniki vasitələrin köməyi ilə qeydə alındıqda inzibati cərimə haqqında elektron qərarlar mülkiyyətçi L.İsayevanın adına çıxarılır.

Bununla yanaşı, vətəndaş L.İsayeva tərəfindən mülkiyyətçisi olduğu avtomobilin faktiki olaraq qanunsuz istifadə edilməsi və törədilən inzibati xətaların onun adına sənədləşdirilməsi ilə bağlı Baş idarəyə hər hansı müraciət daxil olmadığı üçün adekvat tədbirlər həyata keçirilməyib.

Nəzərinizə çatdırırıq ki, vətəndaş L.İsayevanın mediada işıqlandırılan müraciəti artıq Baş idarədə  qeydiyyata alınıb və baxılıması üçün icraata yönəldilib.