Qadın sürücü avtobusu arxadan vurub aradan çıxdı - FOTO

Bakıda vətəndaşların daimi şikayət etdiyi ərazidə qəza baş verib.

Avtosfer.az xəbər verir ki, paytaxtın Nizami rayonunda qadın sürücü avtobusu arxadan vuraraq qaçıb.
Belə ki, Rüstəm Rüstəmov küçəsində Nizami Rayon İcra Hakimiyyətinin binası yaxınlığındakı tunelin altındakı dayanacaqda uzun illərdir Qaraçuxur, Bakıxanov qəsəbələri istiqamətində hərəkət edən "manatlıq" taksilərin yaratdığı sıxlıq qəzaya səbəb olub.
 

77-JA-875 qeydiyyat nişanlı 32 nömrəli avtobus qadın sürücünün idarə etdiyi avtomobil tərəfindən vurulub.
Avtobusun sürücüsü İsmayılbəy Əhmədov Avtosfer.az-a deyib ki, bu dayanacaqda həmişə belə qəza şəraiti yaranır.

"Mən tunelin altına təzəcə yaxınlaşmışdım. Taksilər elə saxlamışdı ki, dayanacağa girmək mümkün deyildi. Birtəhər yavaş-yavaş maşını dayanacağa çəkmək istəyirdim ki, bir maşın arxadan vurdu, yanımdan sürəti artırıb aradan çıxdı".

Sürücünün sözlərinə görə qəza anı avtobusdakı kameralar tərəfində qeydə alınıb və cip kateqoriyasına aid ağ rəngli avtomobilin tapılması, sürücünün şəxsiyyətinin müəyyənləşməsi üçün aidiyyəti quruma şikayət ediləcək.

Səfər