“Zebra” olmayanda piyadanı əzmək lazımdırmı? - FOTO

Belə problemlə ilk dəfə yay vaxtı Parlament  prospektində rastlaşmışdım. Yollar təmir olunduqdan sonra nişanlama bir neçə həftə gecikdi. Doğrudur, asfaltdakı x\tləmələr geciksə də, təmir vaxtı yol nişanlarına toxunulmamışdı. Sadə dillə desək, nişanlar qüvvəsində qalırdı. Lakin...

“Zebra”nın yığışdırılması bir çox sürücü üçün bəhanə oldu. Şəhidlər xiyabanı yaxınlığında Mehdi Hüseyn küçəsinə dönən yolda sürücülər piyadalara yol verməməyə, hətta qəsdən piyadaların üstünə sürməyə başladılar. Hətta piyadalarla davaya çıxanlar da oldu. Artıq məsələ həll edilib.

İndi oxşar problem 8-ci mikrorayonda Ağasadıq Gəraybəyli küçəsində mövcuddur. Bravo supermarketin qarşısında yol nişanları mövcud olsa da, “zebra” təbii mühitin və hərəkət intensivliyinin təsiri ilə aşınıb. Bu səbəbdən əksər sürücülər piyadalara yol vermir. Hansısa sürücü yol versə də, digərləri onu ötüb keçərək qəza riski yaradır. 
Müxtəsəri, bir çox sürücünün təfəkküründə belə bir fikir formalaşıb: “zebra” olmayanda piyadanı əzib keçmək olar.

PS. Son aylarda söhbət etdiyim sürücülərin əksəriyyətində belə bir qəti fikir formalaşıb ki, guya, xaricdə, xüsusən də Rusiyada qadağan olunmuş yerdən keçən piyadanı vurub öldürən sürücü heç bir məsuliyyət daşımır. Bu yalan fikrə dair ayrıca material işləyəcəyik.

Vüqar Yaşaroğlu